නිදහස් අධ්‍යාපනයත්, අධ්‍යාපනයේ නිදහසත් දිනා ගැනීමට ආචාර්ය-සිසු-ජනයින් එක්වෙති

“නිදහස් අධ්‍යාපනයත්, අධ්‍යාපනයේ නිදහසත් දිනා ගැනීමට පෙළගැසෙමු“ යන තේමාව යටතේ අන්තර් විශ්වවිද්‍යාලයීය ශිෂ්‍ය බලමණ්ඩලය විසින් සංවිධානය කළ ආචාර්ය-සිසු-ජන රැලිය ඊයේ (15) විහාරමහා දේවී එලිමහන් රංගපීඨයේදී ඉතා සාර්ථක ලෙස පැවැත්විණි.

ඒ සඳහා විශ්වවිද්‍යාලයීය ආචාර්යවරුන්ගේ සමිති සම්මේලනය, ලංකා ගුරු සංගමය, රජයේ හෙද නිලධාරීන්ගේ සංගමය, මාධ්‍ය සංවිධාන එකමුතුව ආදී වෘත්තීය සමිති රැසකද, පෙරටුගාමී සමාජවාදී පක්ෂය, මාඕවාදී කොමියුනිස්ට් පක්ෂය, සමාජවාදී පක්ෂය, එක්සත් සමාජවාදී පක්ෂය, නව සමසමාජ පක්ෂය ආදී දේශපාලන පක්ෂ රැසකද, ප්‍රැක්ෂිස් සාමූහිකය, පීපල්ස් මාච් ආදී සංවිධාන රැසකද නියෝජිතයන් සහභාගීවූහ. එමෙන්ම විශ්වවිද්‍යාල ශිෂ්‍යයන්, පාසල් සිසුන් සහ දෙමාපියන් රාශියක්ද එම අවස්ථාවට සහභාගී වූහ.

එහිදී අදහස් දැක්වු ජනමාධ්‍යවේදීන්ගේ සංගමයේ ලේකම් සුනිල් ජයසේකර මහතා පළමුව අන්තර් විශ්වවිද්‍යාලීය ශිෂ්‍ය බල මණ්ඩලයට ස්තූතිය පළ කර සිටියේ තම අයිතීන් දිනාගැනීමට සටන් කිරීමට පෙරට ඒම පිළිබඳවය. වැඩි දුරටත් අදහස් දැක්වු ඔහු සදහන් කළේ අද තරුණ යුවලක් විවාහ වු දිනයේ පටන්ම බොරු ලිපිනයන් ලබාදී බොරු කිරීමට සිදුවන්නේ වර්ථමාන අධ්‍යාපනයේ අර්බුදය නිසා බවයි. ඒ තම දරුවා නගරයේ පාසලකට දමා ගැනීමට ඇති තරඟයත්, ගමේ පාසලට ඇති අඩු පහසුකම් නිසාත් බව ඔහු අවධාරණය කළේය.

ඉන් පසු අදහස් දැක්වු පෙරටුගාමී සමාජවාදී පක්ෂයේ දේශපාලන මණ්ඩල සභික චමීර කොස්වත්ත මහතාද අධ්‍යාපනයේ අයිතිය රැුකීමට ඉදිරියට පැමිණි අන්තර් විශ්වවිද්‍යාලීය ශිෂ්‍ය බල මණ්ඩලයට ප‍්‍රශංසාව පුද කළේය. එක්සත් ජාතික පක්ෂයේ ධවල පත‍්‍රිකාව පරාජයට පත් කරන්නට ලාංකීය ශිෂ්‍ය ව්‍යාපාරය පෙරමුණ ගත් නිසාවෙනුත්, ඒ සටන ජයගෙන ආණ්ඩුව දණගැස්සූ නිසාවෙනුත් ශිෂ්‍ය ව්‍යාපාරයට අභිමානවත් ඉතිහාසයක් තිබෙන බව ඔහු විසින් මතක් කළේය.

තවද ඔහු සමස්ථ වැඩ කරන ජනතාවගෙන් ඉල්ලා සිටියේ තම දරුවාගේ අධ්‍යාපන අයිතීන් වෙනුවෙන් වැඩ බිමේ, සේවා ස්ථානයේ අරගල කරන ලෙසයි. අවසාන වශයෙන් අදහස් දැක්වු අන්තර් විශ්වවිද්‍යාලීය ශිෂ්‍ය බල මණ්ඩලයේ කැදවුම් සංජීව බණ්ඩාරද අධ්‍යාපන අයිතිය වෙනුවෙන් සටන් වඳින තම සඟයන්ට ස්තූතිය පළ කළේය. ලාංකීය සමාජය තුළ සිදුවන සියලූ අරගල තුළ ජීවත් වෙමින්, ඒවාට අපගේ නොමඳ සහාය දක්වමින් ඔබට ධෛර්යයක් වීමට වෙනසකට තරුණ හඬ ව්‍යාපාරය කිසි විටෙක මැළිවන්නේ නැති අතර අතර ආචාර්ය, සිසු, ජන අරගලයට ශක්තිය ප‍්‍රාර්ථනා කිරීමට මෙය අවස්ථාවක් කර ගනිමු.